Artza Eguna ospatuko dugu gaur

Ermuan gaur ‘Hartza eguna’ ospatuko dugu, azken hamazortzi urteko inauterietako ostiralero legez. Euskal Birusa elkarteak, herriko ikastetxe eta euskaltegiek, Alboka musika eskolak eta Debabarreneko Bertsolari Eskolak eta bat egingo duten herritarrak kalejiran aterako dira, ‘Txindurrik’ idatzitako kopla zaharrak kantatzeko eta hartza kaleetatik paseatzeko. Kalejira arratsaldeko 6etan irtengo da, Orba kardinalaren plazatik.

Hartza Eguna Euskal Birusa elkarteak 1990ean berreskuratutako tradizio herrikoia da. Ordutik ez du kalerik egin inauterietako programan, eguen zuri izeneko egunaren biharamunean, herriko bazter guztiak musika eta bertsoz bete eta alaitzeko, hartza animali belarjalearen figura tartean daramatela.

Ekimenaren eta kantatzen diren bertsoen istorioa

1934. urtea zen. Herriko gazte bat tuberkulosiarekin gaixotu zen; garai hartan gaixotasun larria zen, zainketa zein botika bereziak behar zituena. Haren senitartekoek egoerari aurre ezin ziotela egin ilusita, bere lagunek nolabait laguntzea erabaki zuten. Gillermo Bengoetxea ‘Txindurri’ herritar eta bertsolariaren etxera joan ziren eta bertso batzuk idazteko eskatu zioten. Kopla horiekin kalehira egin eta dirua batzea zen helburua. Aratuste edo Inauteri sasoia zenez, mozorroak jantzi eta kalera atera ziren kantatzera, mila pezeta bilduz; ordurako dirutza izugarria.

Artzaren istorioa eta tradizio hori adinari egokiturik nondik datorren ere kontatzen du, euskara zerbitzuak umeentzat pintatzeko prestatu duen koadernoak. Bertan herriko historiaren, ohituren eta pertsonaien berri ematen baita.

Harrezkeroztik, berrogeita hamar urte luzeetan ez zen kalejirarik errepikatu, Euskal Birusak ekimen herrikoi hori berreskuratu bitartean. Orain hamazortzi urteren bueltan, tradizio oso sustraituta dago eta arrakastatsua da. Aurtengoan, elkarteak istorioaren koplen autorearen eta beste zenbait atalen berri lau haizeetara zabaltzeko liburuxka bat argitaratu du, argazki eta testuz osatutakoa. Halaber, Alboka musika eskolarekin elkarlanean koplak bildu eta DK (disko konpatuan) batean grabatu ditu. Material hori herriko ikastetxe eta euskaltegietara bidali du ezagutzera emateko. Web gune honen material bi horiek zabaltzen laguntzeko xedez, hemen bertan eskaintzen dizuegu. Idatzizkoa pdf formatoan eta jarraian uzten dizuegu. Eta soinua lasterbidez informazio gehiago atalean lagantzen dugu, konprimituriko zip karpeta batean, jaitsi nahi duenarentzat.

• Versos e historia

• Herriko historiaren pasarteak jasotzen dituen liburuxka, doan behera ekarri eta koloreztatzeko