Hitzaldia: zein da Fracking teknikarenegoera Euskadin?

AltErmuatiba taldeak ‘Fraking- teknikaren inguruko hitzaldi informatiboa antolatu eta deitu du gaur arratsalderako, zeina Lobiano Kultur gunean gauzatuko den arratsaldeko 7etatik aurrera. Hizlaria Aitor Urresti industri ingeniari izango da eta Euskadin egun dauden baimen eta kontzesioen inguruan hitz egingo digu, batez ere Durangaldea eta Debabarrena eskualdeei dagokionean zentratuz. AltErmuatiba taldeak Ermua fracking teknikatik libre deklaratu dadila lortu nahi du. Taldea Kulturen arteko jaialdiaren egunean, ekainaren 1eko larunbatean, stand bat jarri zuen plazan informazioa emateko.

Haustura hidraulikoa (ingelesez hydraulic fracturing edo fracking izenez ezaguna) presio handiko fluido baten bidez harri-geruzak hausteko prozesua da. Oro har, petrolioa, gas naturala edo beste substantzia batzuk lurzorutik erauzteko sortutako prozesua da. Haustura-lan bakoitzean, putzu bat zulatzen da erreserbak dituzten harri-formazioetan. Presio handiko fluidoa injektatzeak zartadura berriak sortzen ditu harkaitzean, erregai fosilen erauzte-tasak handituz. Hausturen zabalera mantentzeko, habetzaile bat sartzen da fluidoan, hau da, hausturak ixtea galaraziko duen elementu bat: harea, zeramika-zatiak, produktu kimikoak edo beste zenbait partikula.

Haustura hidraulikoak kezka eragin du mundu zabalean, jardunbide horrek lurpeko eta lur gaineko urak kutsatu ahal dituenez ingurumenaren, osasunaren eta segurtasunaren gainean eragin potentzial handia duelako, eta zenbait herrialdetan bertan behera utzi da edo debekatu egin da.