Sukaldaritza ikastaroa langabetuentzat, Josu Mugerza sukaldariarekin

Udal Gizarte Ongizate zerbitzuek eta Tokiko Garapen Alorrekoek Oinarrizko Sukaldaritza Lanak espezialitateko ikastaroa gauzatzen ari dira. Ikastaroa egiten hamazazpi langabetu eta herriko bizilagun daude, gizarteratzea eta lan munduratzea ahalbidetzeko bideak lantzen ari direnak. Ekimenaren helburua da parte hartzaileei sukaldaritzaren oinarrizko ezagutzak ematea, horretan trebatuz gero enplegua lortzeko aukera gehiago izan dezaten. Ikastaroak 204 ordu ditu, 180 ezagutza espezifikoetarako, 6 elikagaiak manipulatzen ikasteko eta gainerako 16ak taldean orientazioa lantzeko. Ikastaroa ematen ari da Josu Mugerza sukaldari ospetsua, Elgoibarko San Miguel gainean Belaustegi Jatetxearen jabe dena.

Ikastaroak eduki teorikoak eta praktikoak barne hartuko ditu. Edukiak “Sukaldaritzako oinarriko lanak” ziurtagiri profesionalean jasotako berberak dira, kualifikazio 1ngo mailakoak. Hiru trebakuntza atal lantzen ari dira, hain zuzen ere ondorengo hauek:

1. Sukaldaritzan aplikatutako arauak eta baldintza higieniko eta sanitarioak ezagutzea, elikagaiak manipulatzeko ikastaroa barne egonik.
2. Oinarrizko eta gutxieneko lanak sukaldean; sukaldaritza gaiak prestatzen laguntzea.
3. Plater konbinatuak eta aperitiboak prestatzen ikastea.

Ikastaroa Txalaparta Gastronomi Elkartean ematen da astelehenetik ostiralera, goizeko 9:15etatik arratsaldeko 13:45ra bitartean. Antolatzaileek elkartearen laguntza eta egoitza laga izana biziki eskertzen dute.

Ikastaro egileek jaki, plater eta pintxoen manipulazio, prestatze eta kontserbatze prozesuak ikasi eta horietaz jabetuko dira. Prozesu horietan balioa eransteaz gain, goi mailako sukaldaritzaren hainbat aspektu ere ikusiko dituztelarik, esaterako, produktuen izaera errespetatzen, urtaroa kontutan hartzen, aurkezteko moduak eta bezeroari harrera eta zerbitzua ematen.