Giro politarekin hasi da Euskal Liburu eta Disko azoka Ermuan

XXII. edizioak bere ateak zabaldu ditu eta dagoneko azken nobedadeak igandera arte ikusteko aukera dugu plazan. Aurtengo egitarau oparoak asteazkenean izan zuen lehendabiziko ekitaldia, Haur Liburutegian egin zen aurkezpenean Badihardugu elkarteak argitaratu duen “Ermuko Aditz-Taulak” aurkeztu zituen, lan hori azokan salgai eta eskuragarri dago. Ostegunean, berriz, Markos Gimenok argitaratu berri duen “131 Aza” palindromo liburua esku-artean izan genuen, lan bikaina, euskaraz egiten den lehen palindromo-liburua baita, horren berri zehatza, egileak maiatzaren 12an emango du Lobiano kulturgunean arratsaldeko 19:00etan izango den aurkezpenean.

Ostiralean, ohiko legez, ikastetetxetako bisita izan dugu eta gure gazteek liburu artean goiz ederra pasatu zuten, eta horrela jarraitzen du egitarauak aurrera. Gaur bertan, arratsaldeko seietan Iñaki Carreterok ipuin saioa eskainiko du eta bihar eguerdian umeentzako tailerrak izango dira. Azokak ateak igandera arte zabalik izango ditu, egun horretan, eguerdiko ordubatean Mikel Arrilagak, Unai Agirrek eta Nerea Ibarzabal bertso saioa eskainiko dute. Azokak 21:00etan postuak itxiko ditu, baina, dena den, egitarauak hurrengo astetan zehar zer ikusi eta zer entzun ugari izango da.