Gipuzkoa Etorbideko eraikinaren kalte materialak eragin dituen sutea

Gipuzkoa Etorbideko 39. eraikinaren –Sallabente geltokitik hurbil eta atzeko maldan kokatutakoan- teilatua eta barruko aldean kalte materialak eragin dituen sutea izan dugu bart gauean gure udalerrian, udaletxeko Hiritarren Segurtasunerako Alorrak aditzera eman duenez bertan izan ziren Udaltzainek txostenean jasotakoaren arabera. Gertakizunean pertsona inork ez zuen minik hartu edo zauririk izan, ustez barruan ez baitzegoen inor edo bizilagunek kanpora atera zirelako, herriko Estatistika Unitateak frogatu izan duenez erroldak jasotzen duenez helbide horretan altan dauden bizilagunak baititugu. Kalteen zenbatekoa ez da oraindik zehaztu eta suaren jatorria zehazteko ikerketa zabalik dago.

Abisuaren berri jakin bezain pronto Larrialdietako prozedurari bide eman zitzaion eta lekura Ertzainen eta Udaltzainen unitateak bertaratu ziren. Eta baita Eibar eta Durangoko parkeetatik iritsi ziren suhiltzaileen hainbat unitate –sei guztira- sua itzaltzeko lanean izan zirenak goizaldeko ordu biak arte. Suaren berri izan ondoren Hirigintza Alorreko zinegotzi eta zuzendaria bertara hurbildu ziren, baita Ur Kontsortzioaren eta Eusko Tren-ETS langile bana ere. Kontsortziokoak hurbilen zegoen ur-hargunearen kokapena adierazi zien su-hiltzaileei.