Aitor Hernandezek mundialaren osteko birari amaiera eman dio espero zuenaren azpitik

Aitor Hernandezek (Specialized-Ermua) ezin izan zuen atzo Hoogstraten herriko lasterketa amaitu, %80aren arauaren aplikazioz, eta 34. postuan geratu zen sailkapenean. Larunbatean ere, ez zuen zorterik izan, kontrol postua baino 700 metro aurretik kate hautsi zuelako, helmugan 42. sartu zelarik. Ermuarrak mundialaren osteko birari amaiera eman dio adierazitako hiru lasterketaz, nahiz espero zuenaren azpitik izan. Arrazoien artean, behar bada, ondokoak ditugu; nekea estatuko denboraldia luzea izan delako eta baita hain ohikoak ez dituen baldintza eta zirkuituetan korritzea.

Denboraldiaren azken txanpan sartuta, beste bi karrera korrituko ditu Belgikan asteburu honetan, hain zuzen ere Middelkerke eta Eeklo hirietan.

Belgikan emandako azken aste honen inguruan ermuarrak honakoa esan du “astea ez da hain negatiboa izan, nazioartean non egon naitekeen ezagutzeko balio dit. Taldeak eta babesleak egiten duten ahalegina aintzat hartu behar dugu, honako astea atzerrian pasatzea ahalbidetu baitigute”.