Ermuak bat egin du ‘Planetaren ordua 2015 ekimenarekin’ eta bi plazatako argiak itzaliko larunbatean

WWF erakundeak mundu guztirako egin duen "Planetaren Ordua 2015" deialdiari atxiki eta horrekin bat egiteko erabakia hartu du Ermuko Udalak. Hori horrela, ordu betez Orbe eta San Pelaio plazako argiak itzaliko ditu larunbat iluntzean, zortzi eta erdietatik bederatzi eta erdietara bitarteko tartean. Hirurogei minutu ilunetan, klimaren aldaketari aurre egiteko munduko mobilizazio eta parte-hartze kanpainarik handiena gure planetako ingurumena babesteko xedez. Keinu bakoitzak, asko balio du.

Ekimena klima-aldaketaren aurkako sinbolo bilakatu da eta aurtengo edizioa bereziki garrantzitsua da, izan ere, abenduan, Parisko Gailurrean, klimaren aldeko akordioa onartzeko erronka baitute mundu osoko gobernu buruek. Akordio horren helburua klima-aldaketa kontrolatu ahal izatea da, hala inpaktu ekologiko, ekonomiko eta sozial kaltegarrienak saihesteko.

Abian jarri zutenetik, 2007. urtean, Planetaren Orduak garrantzi handia hartu du, eta ekitaldi sinboliko izatetik munduko ingurumen-kanpainarik handiena izatera igaro da. Udalsarea 21ek ekimenean parte hartzera eta kanpaina zabaltzera animatu ditu bere erakunde kideak. Ermuak, Bilbok, Donostiak, Getxok, Irunek, Ozaetak, Errenteriak eta Gasteizek kanpainarekin bat egin dute dagoeneko. Kanpaina hainbat erakunde eta giza talderi dago zuzenduta: udalak, herritarrak, ikastetxeak, elkarteak eta enpresak. Pertsona orok eta keinu orok du garrantzia aldaketa global bat lortzeko; guztiok gara konponbidearen zati.

Hasi da atzerako kontaketa: jar zaitez martxan, eman izena eta erabili zure indarra mundua aldatzeko.

Larunbata, martxoak 28, 20:30etik 21:30era. Itzali ezazu argia!