Musika, Santixauetan jaun eta jabe Ermuko kaleetan

Santixau jaietan murgilduta dabil Ermua, eta datozen egunetan musika eskaintza zabal bezain anitza izango dugu geurean. Larunbatean izan zen jaien aurreko beroketa, El Arrebato abeslari sevillarraren kontzertuarekin, eta jada gainean ditugun festa egunetan ere musikak ez du etenik izango.

Estilo guztietako emanaldiez gozatzeko aukera izango da gau eta egun, eta Emon eta Jeanetteren kontzertuak izango dira nagusi, jaien azkeneko egunean. Festari agur esan aurretik, baina, elektronikak, rockak eta world musikak girotuko dute egunero San Pelaio plaza. Ezin ahaztu, bestalde, Santixauetan ohikoak diren erromeriak eta fanfarreak, herriko kaleak musikaz blai utziko baitituzte.

Lotura honi jarraiki izan dezakezue jaietan izango ditugun emanaldi guztien berri, Santixauetako programari esker; kontzertu guztiak, aldiz, segidan txertatutako taulan topa ditzakezue.