'Paris a toda costa', gaur gauean Orbe Kardinala plazan

Udako zine zikloa azken txanpan sartu da jada, eta ''Paris a toda costa'' filma izango dugu ikusgai azken aurreko hitzorduan. Ohi bezala, gaueko 22:00etan izango da emanaldia Orbe Kardinalaren plazan.

Komedia frantziar hori Reem Kherici zinemagileak zuzendu du, eta bera da filmeko protagonista nagusia. Cécile Cassel, Tarek Boudali, Philippe Lachaux, Shirley Bousquet, Salim Kechiouche, Stéphane Rousseau eta Pascal Demolon aktoreak ditu inguruan, besteak beste.

2013an estreinatu zen filma, eta 95 minutu inguruko iraupena du.

Sarrera doakoa da, eta egurrezko eserlekuak izango dira plazan. Bestalde, eguraldi txarra izango bagenu, Santiago Apostoluaren elizako arkupetan eskainiko litzateke filma.

Sinopsia

Maya Ben Latifen ametsak bete dira: Parisen egiten du lan Modari buruzko aldizkari batentzat. Emakume orok desio duen bizitza dauka: polita da, azkarra, osasuntsua, eta lan ona dauka. Guztia okertuko da, ordea, gau batean Poliziak atxilotu eta bere jaioterrira, Marokora, deportatuko baitu. Konponbidea bilatzen saiatu arren, familiarekin bueltatu beharko du, eta 24 ordu baino gutxiagoan, bere bizitza erabat aldatuko da. Orain, kultura ezberdin baten arau eta aurreiritzien arabera bizi beharko du.

Pelikularen trailerra hemen behean ikus dezakezue: