Errotabarri Eskubaloi Taldeak VI. Ermua Hiria txapelketa antolatu du irailerako

Hilabete baino gutxiago falta da seigarren Ermua Hiria emakumezkoen eskubaloi txapelketari hasiera emateko. Errotabarri Eskubaloi Taldeak antolatuta, irailaren 19an eta 20an jokatuko dira partiduak Miguel Angel Blanco kiroldegian eta Betiondo kirolgunean.

Urtero bezala, etxeko taldeak hiru klub gonbidatu ditu txapelketan parte hartzera, eta beste talde bat gehiago, senior mailako emakumeen aurkezpen partidua jokatzeko. Aurtengoan, Zarautz, Lizarreria (Lizarra, Nafarroa) eta San Adrian (Bilbo) taldeek jokatuko dute txapela, eta Bera Bera (Donostia) izango da aurkezpen partiduko gonbidatua.

2015-2016 denboraldia berezia izango da Errotabarrirentzat; izan ere, Zilarrezko Ohorezko Mailan jokatuko du aurten, emakumeen eskubaloiko bigarren maila Espainian, Atletico Basaurik bere postua eskaini ostean.

Bederatzi partidu bi egunetan

Eskubaloiaren jaia irailaren 19an, larunbata, goizeko 10etan hasiko da, Miguel Angel Blanco kiroldegian. Bertan jokatuko dute kadeteek, eta jubenilak ere toki berean arituko dira arratsaldez. 20:00etan, klubak 2015-2016 denboraldiko taldeak aurkeztuko ditu jendaurrean, eta senior mailakoen partiduak itxiko du eguneko agenda.

Irailaren 20an, goizeko 10etatik aurrera, kadeteen eta jubenilen arteko hirugarren eta laugarren posturako partiduak jokatuko dira Betiondon, eta Miguel Angel Blanco kiroldegian, aldiz, finalak. 13:30ean amaituko da txapelketa, sari banaketarekin.

Jarraian ikus dezakezue egutegi osoa:

VI. Ermua Hiria txapelketa

• Irailak 19, larunbata
  

  M.A. Blanco kiroldegia

  Kadeteak:

  • 10:00 Zarautz – San Adrian
  • 11:30 Errotabarri – Lizarreria

  Jubenilak:

  • 16:45 Zarautz – San Adrian
  • 18:30 Errotabarri – Lizarreria

  Klubaren aurkezpena

  • 20:00 Seniorren partidua: Errotabarri – Bera Bera

• Irailak 20, igandea
  

  Betiondo kirolgunea:

  • 10:00 Hirugarren eta laugarren postua, kadeteak
  • 11:30 Hirugarren eta laugarren postua, jubenilak

  M.A. Blanco kiroldegia:

  • 10:00 Kadeteen finala
  • 12:00 Jubenilen finala
  • 13:30 Sari-banaketa