Verdiren 'La Traviata' opera ikusgai izango da Ermua Antzokian

Asteburuan opera eskaintza aparta izango dugu gure herrian, Ermua Antzokian mota horretako bi ikuskizun izango baitira. Bietatik lehena, ostiral honetan: "La Traviata".

Camerata Lirica taldeak Verdiren obra ezagunaren moldaketa aurkeztuko digu ostiralean 22:15etik aurrera. Azken ehun urteetan mundu guztiko eszenatokietan gehien antzeztu den opera da, eta arrakastaren bermea dauka. Venezian estreinatu zen 1853. urtean, eta harrezkero, operaren mundua aise gainditu dute obrako melodiek, brindis famatua bezala, esaterako, ereserki bihurtzera iritsiz.

Opera ia bere osotasunean moldatu du Camerata Liricak, eta antzezpenak pianoa izango du alboan, arin eta ulergarri. Operaren ezaugarri zorrotzenak bere horretan mantentzen ditu, bai musika aldetik, bai antzezpen aldetik ere (atrezzoa eta garaiko janzkera, adibidez).

Rodolfo Albero da 90 minutuko obra horren zuzendaria, eta aktore/kantari gisa ere ikus dezakegu, Inmaculada Lain, Ivan Barbeitos, Beatriz Arenas eta Alejandro Guillenekin batera, besteak beste.

• "La Traviata" obraren dossierra

Sarrerak salgai daude jada 10 euroren truke Lobiano Kultur Gunean, BBKren orotariko kutxazainetan, Kutxabanken webgunean eta, ikuskizuna hasi baino ordu bat lehenagotik, Ermua Antzokiko leihatilan.