Ermuko arkulariek arrakasta lortu dute Bizkaiko Txapelketan

Betiondo Arku Tiraketa Klubeko kideek Bermeon jokatu den Arku Tradizionaleko Bizkaiko Txapelketan parte hartu zuten pasatu den igandean. Basilio Izquierdo eta Mikel Lopez kirolari ermuarrek sekulako emaitzak lortu dituzte lehiaketa horretan.

Lehenengo postua eskuratuta, Aretoko Arku Tiraketako Bizkaiko Txapeldun izendatu da Basilio Izquierdo arkularia, Betiondo klubeko presidentea. Bestalde, Mikel Lopez taldekideak bigarren postua eskuratu du, eta Bizkaiko Txapeldunorde izendatu da kategoria berean.

Bermeoko Arku Klubak antolatu du XXII. Gabonetako Txapelketa hori, Bizkaiko Arku Tiraketa Federazioaren laguntzarekin, eta herriko Arane kiroldegian jokatu da.