Aitor Hernandez, jaun eta jabe Oñatin

Aitor Hernandez (Specialized-Ermua Impulso) Espainiako txapeldunak denboraldiko hamabigarren garaipena lortu du Oñatiko lasterketan. Bigarren sailkatu zen Julen Zuberori minutu bat baino gehiagoko aldea atera zion Hernandezek.

Euskadiko Txapelketarako astebeteren faltan iritsi da garaipena, eta bere buruarekin seguruago sentitzeko balio dio ermuarrari: “Hasieratik dena eman dut. Irabaztea zen aukera bakarra, eta neure bertsiorik onena aurkitu nahi izan dut. Tartea irekitzeko aukera izan dudanean, aurrera jarraitu eta nire lasterketa egiten saiatu naiz. Beti esaten dut aurrera begiratu behar dela, eta horixe egin dut”.

“Irabazteak beti ematen du poza, edozein lasterketatan dela ere, beraz, gustura nago egindakoarekin. Legazpin zazpi egun barru jokatuko den Euskadiko Txapelketarako gogotsu nago. Beti lasterketa gogorra izaten da, maila handikoa. Lerro berean mantendu behar da, lanean jarraitu eta denboraldiko hurrengo helburuak betetzeko indarrak hartzeko”, zehaztu du txirrindulariak.