Aitor Hernandez ez da 2016ko Munduko Txapelketara joango

Aitor Hernandez txirrindularia ez da aurtengo Munduko Ziklokross Txapelketan lehiatuko. Ermuarra Espainiako selekziotik kanpo utzi dute, eta ez da igande honetan Zolderren (Belgika) korrituko den lasterketan izango.

Duela gutxi ezagutu zen albistea, eta ustekabean harrapatu dituen bai Hernandez, bai bere taldea, baita bere jarraitzaileak ere. Izan ere, Espainiako Txirrindulari Federazioaren rankingean lehen postuan agertzen da bizkaitarra, aurtengo denboraldian 14 garaipen eskuratu baititu. Hala ere, kurrikulum ikusgarri hori ez da nahikoa izan, eta Javier Ruiz de Larrinaga eta Ismael Esteban izango dira Munduko Txapela lortzeko lehian.

Euskadiko txapelduna da Hernandez, eta duela aste batzuk bi eroriko izan zituen Espainiako Txapelketan, Torrelavegan. Sorbaldan kolpea hartu zuen, eta laugarren postuan amaitu zuen lasterketa. Hori dela eta, Federazioak ermuarra hautatuen zerrendan ez sartzea erabaki du, bere egoera fisikoa onena ez delakoan, Hernandezek ongi sentitzen dela esan arren.

Erabakiak zur eta lur, atsekabetuta utzi ditu txirrindulariaren ingurukoak, baina kirol mundua horrelakoa da, onerako eta txarrerako. Zorterik onena opa diogu ermuarrari, ziur baikaude laster poztasun ugari ekarriko dizkigula.

Aitor Hernandezen taldeak argitaratutako oharra osorik ikus daiteke bere webgune ofizialean.