Gu ere bertsotan: hizkuntza gaitasunak uztartuz, ahozkotasuna indartu

Hizkuntzarekin jolas egin daitekeela ikastea eta hitza bera opari eta omenaldi bihur litekeela ikustea aberasgarria da. Hori dela eta, ahozkotasuna eta bertsolaritza sustatzeko helburuz, aurten, Ermuko Udalak Bizkaiko Bertsozale Elkartearen eta herriko Lehen Hezkuntzako ikastetxe guztien lankidetzaz, Gu ere bertsotan izeneko programa abian jarri du.

Ahozko komunikazioa lantzea da proiektu honen helburua, horretarako bertsolaritzaren hainbat baliabide erabiliz, bertsolaritzak hizkuntza normalkuntzan lagun dezake, hizkuntza haurren eta gazteen aurrean prestigiatu eta erabiltzeko motibazio pizgarri izan daitekeelako.

Ermuan, ikasturte honetan herriko ikastetxe guztietan abian jarritako programa honetan 200 ikaslek baino gehiago hartzen dute parte. Helburuak asko dira: ahozko adierazpidea hobetzea, komunikazio estrategia eraginkorrak baliaraztea, hizkuntza aldetiko sormena bultzatzea, jendaurrean egoteko eta hitz egiteko oztopoak gainditzea, ideiak ordenatzen laguntzea eta komunikatzaile onak heztea. Beraz, bertsolaritza gure Hezkuntza Proiektuan jasotako helburuak bermatzeko tresna ezin hobea dugu.

Proiektuaren oinarri pedagogikoa Bertsolaritzaren curriculuma Lehen Hezkuntza lanean biltzen da eta bertan jasotzen dira bertsolaritzaren ikastetxetako lanketak haurren garapenari begira dituen helburuak, hauei loturiko edukiak, metodologia zein ebaluazio irizpideak.