Komikia eta nobela grafikoa, protagonistak

Erabiltzaileen artean komikien eta eleberri grafikoen irakurketa bultzateko lanean dihardu udal liburutegiak azken hilabeteetan. Pasa berri den astean, gazteak komikien mundura hurbiltzeko hamar tailer burutu ditu: bost literaturaren ikuspuntutik eta beste bost ilustrazioaren ikuspuntutik.

Literatur saioak Peru Magdalena idazle, bertsolari eta ilustratzaileak eta Unai Iturriaga bertsolari, idazle eta "Diamanteak, urrea eta ikatza" (Athletic Club Fundazioa, 2015) komikiaren gidoigileak gidatu dituzte, ikastetxeetako irakasleekin koordinatuta. Martxoan Ermua BHIko eta San Pelaio ikastetxeko DBHko 4. mailako ikasleek eta Batxilergoko lehenengo mailakoek Unai Iturriagaren komikiaren ale bana jaso zuten,  Athletic Club Fundazioak eskainita. Ondoren, topaketa horietan komikia komentatu dute, eta literatur generoa eta bere oinarriak hurbiletik ezagutzen saiatu dira.

Bestalde, ilustrazio tailerrak Josean Morlesín marrazkilari eta  UPV/EHUko Arte Ederretako irakasleak eman ditu. Saio horietan, literatur genero honen formatua eta estilo desberdinak ezagutzeko sarrera egin du. Bukatzeko, eta tableta grafiko baten bitartez, guztien artean bineta-tirak osatzeko hainbat teknika erakutsi ditu.

Ekintza horien osagarri dira liburutegian dagoen komiki berrien erakusketa eta bi hilabete hauetan komikiak maileguan hartzen dituzten pertsona guztien artean egingo den zozketa. Opariak egileek eskainitako komikiak izango dira, Iñaketen "Ötzi" eta Pablo Ríosen "Fútbol" eta "Azul y pálido".

Zatoz liburutegira eta ezagutu literatur generoa!