Bidarik lasterketa herrikoiarekin ospatuko du bere eguna

Bidari Ermuko Gutxitu Fisikoen edota Organikoen Taldeak lasterketa herrikoiaren bosgarren edizioa antolatu du larunbat honetarako, maiatzak 21. Proba 11:00etan hasiko da Orbe Kardinala plazan, eta hiru kategoriatan banatuta dago: 5 eta 9 urte artekoak, 9 eta 12 urte artekoak eta helduak.

Bidari Egunaren barnean kokatzen da lasterketa, eta herriko zentro kulturalek, FEKOORek, EMOEk eta Ermuko Udalak babesten dute, besteak beste. Egin beharreko ibilbidea aldatu egingo da mailaren arabera, baina parte-hartzaile guztiak Orbe Kardinala plazatik abiatuko dira, eta Valdespina Markesa, Izelaieta eta Goienkaletik igaro ostean, Zubiaurrera itzuliko dira bide ezberdinetatik.

Lasterketan izena eman nahi izanez gero, ramosaizpuruai@gmail.com edota v.munoz.garcia@gmail.com helbideetara idatzi beharko da, izena eta telefonoa emanez. Larunbatean bertan ere izango da izena emateko aukera, proba hasi baino ordu erdi lehenago, plazan. Haurrek bi euroko dohaintza egin beharko dute parte hartzeko, eta helduek, aldiz, bost eurokoa.

Lasterketaren ostean, txistorrada herrikoia egingo da Orbe Kardinala plazan.

Bidari Ermuko minusbaliatu fisikoak biltzen dituen elkartea da. 1994. urtean eratu zen eta harrez geroztik lanean dihardu kideek gizarteratu eta horretan eroso senti daitezen, mugei aurre eginez. Horretarako, informazioa ematen eta lan-munduratzea lortzearen alde ahalegintzen dira. Horrez gain, bazkideei izapideak egiteko laguntza ematen diete, esaterako ibilgailua erosteko minusbaliotasunaren ziurtagiria lortzen, eta abar… Bidari elkartea une honetan oro har pertsonen erabateko garapena lortzeko ahaleginetan buru-belarri segitzen du eta, baita ere, bazkideen artean kirola sustatzeko lanetan.

• Lasterketa herrikoiko kartela