Aitor Hernandez nagusi Zangotzan, BTTko Caja Rural Kopan

Aitor Hernández txirrindulariak (Specialized-Ermua Impulso) beste erakustaldi bat eman du igande honetan Zangotzan, Nafarroan, BTTko Caja Rural Kopako bosgarren proban garaipena eskuratu baitu.

Ibilbide gogorrean erraztasun handiz irabaztea lortu du txirrindulari ermuarrak. Lasterketa eguraldiak baldintzatuta egon da uneoro, tenperatura altua eta etengabeko eguzkia izan baitira protagonista.

“Zirkuitua nahiko gogorra izan da, etengabeko igoeraz eta jaitsieraz betea, eta zorua oso lehor egon da beroagatik. Orokorrean, lasterketa zaila izan da, baina oso gustura sentitu naiz, pedalkadez gozatuz. Pixkanaka forma hartzen ari naiz, eta gero eta lan karga handiagoari egiten  diot aurre ziklokross denboraldirako oinarri ona edukitzeko. Bihar –gaur, astelehena– Villasana de Menara bidean (Burgos) izango naiz, ostiraletik aurrera BTTko Burgoseko Itzulian lehiatzeko”, azaldu zuen txirrindulariak cross country denboraldiko hirugarren garaipena eskuratu ostean.