The Congress talde estatubatuarrak bere azken lana aurkeztuko du larunbat honetan Lobianon

“Guretzat naturala dena egiten dugu. Ez gara batere onak geure burua sailkatzen”. Horrela aurkezten da larunbat honetan Ermuan izango den The Congress talde iparramerikarra. Richmond, Virginiako laukoteak bere azken lana aurkeztuko du bihar 20:00etatik aurrera Lobiano Kulturgunean.

Moldakor bezain harrigarriak dira The Congress, eta pasatu den irailean kaleratu zuten euren laugarren diskoa, “The Game”. Euren soinu bereziari eutsita, rock n’rolla, betiko soula, country klasikoa eta psikodelia uztartzen ditu laukoteak.

Scott Lane eta Jonathan Meadows musikariek sortutako taldea Mark Levy bateria-joleak eta, 2014tik, Chris “Bernie” Speasmaker tekla jotzaileak osatu dute.

Ez ezazu galdu luzaroan entzungo duzun talde amerikarrik onenarekin gozatzeko aukera. Utz ezazu larunbat honetan The Congressen musikak eta abesti indartsuek harrapa zaitzaten. Sarrerak salgai daude 8 euroren truke Lobiano Kulturgunean, BBKren orotarako kutxazainetan edota Kutxabanken webgunean.

Taldearen abestirik berrienetako bat uzten dizuegu, “The Poison and The Antidote”. Gehiago entzun nahi izanez gero, jo ezazu taldearen Bandcamp profilera.