Aitor Hernández Euskadiko txapeldun Berrizen

Specialized – Ermua Impulso taldeko Aitor Hernández txirrindulariak denboraldiko seigarren garaipena eskuratu du larunbat honetan Berrizko Ziklokross Sari Nagusian. Proba horri esker, euskal egutegiko azken aurrekoa, laugarren aldiz Euskadiko Txapelketa eskuratu du ermuarrak.

Lasterketako lehenengo uneetatik jada garbi ikusten zen Aitor Hernándezek nagusitasunez egiten zuela aurrera. Dena dela, txirrindularia lasaitu egin zen amaiera aldera, gaur astelehena Belgikan, Zolderren Munduko Txapelketan lehiatzen baita.

Euskadiko laugarren txapela eskuratu ostean, Specialized – Ermua Impulso taldeko txirrindulariak azaldu zuen “zirkuitu gainean oso lasterketa polita” izan zela: “Oso irristakorra, gogorra eta teknikoa zegoen zirkuitua, eta zati asko oinez egin behar ziren, ezin baitzen bizikleta gainean pasa handik. Orain gauzak prestatu eta bagoaz Belgikara, ea Zolderren lasterketa ona egiten dudan. Gabonak pasatzeko modu ezberdin bat da!”.