Microdecok Eusko Jaurlaritzaren Urrezko A jaso du kudeaketa aurreratuagatik

Microdeco S.A. enpresak Urrezko A saria jaso du, Kudeaketa Aurreratuaren saria, alegia. Aipamen horrek kudeaketa praktiketan aurreratuen dauden eta interes talde guztiak –bezeroak, langileak, akzionistak eta gizartea, orokorrean- gogobetetzea bilatzen duten erakundeak saritzen ditu.

Eusko Jaurlaritzaren arabera, Microdeco enpresak kudeaketa sistema ebaluatzeko eta hobetzeko erreferentzia gisa erabiltzen du kudeaketa aurreratuko eredua, eta horregatik irabazi du saria, Euskaliteko kideek kanpo ebaluazioa egin ostean.

Sari horren helburua euskal erakundeen artean kudeaketa aurreratuak lehiakortasunerako gako gisa duen garrantzia hedatzea eta erakustea da. Gainera, Euskadiko kudeaketa praktika onenak aurkitu eta erakunderik aurreratuenak goraipatzea du xede.

Ermuko Urtia industrialdean kokatzen da Microdeco S.A., eta dekoletaje arloan aritzen da. Zehazki, konplexutasun handiko piezen fabrikazioan espezializatutako enpresa da, punta-puntako teknologia erabiltzen duena. Langileak kualifikazio altukoak dira, eta produkzio prozesuan zehar kalitate kontrol zorrotzak pasatzen ditu.

José Iraolagoitia zuzendari nagusiak jaso zuen saria enpresaren izenean pasatu den abenduan. Zuzendaritzak larunbat honetan, urtarrilak 28, langile guztiekin partekatu eta ospatuko du izendapena enpresaren egoitzan bertan 12:30etik aurrera. Carlos Totorika alkatea eta Juan Carlos Abascal lehenengo alkateordea izango dira ekitaldian.