Saharar errefuxiatuen kanpamentuetara bidaltzeko elikagaien bilketaren azken astea

Mendebaldeko Saharar herriarekin elkartasunerako plataformak herrian elikagaiak biltzeko aurtengo kanpaina abian du, bildutako guztia Tindufeko errefuxiatuen kanpamenduetara bidaltzeko asmoz. Bilketa anpaina bere azken egunetan sartu da. Pertsona ugari Erdikokaleko lokaletik pasa da eta bere ekarpena egin du. Nolanahi ere, antolatzaileek azken dei eta ahalegina eskatzen dute, elkartasuneko euskal karabanak eramango duen zama ahalik eta handiena izan dadin.

Herriko plataformak otsailaren 4ra bitartean oinarrizko elikagaiak bilduko ditu, Erdikokaleko 1 etxabeko lokalean (Juani ohialak denda ohian). Kanpaina hau ‘Mendebaldeko Sahararen aldeko euskal karabana ‘piztu itxaropena’ izeneko ekimenaren barne dago. Ekimenaren xedea bildutakoa Tindufeko (Aljeriaren hego-mendebaldeko lurraldean) errefuxiatuta daudenei bidaltzea da, haiek jasaten ari diren elikagai urritasun eta eskasiari aurre egiteko, azken boladan gabezia eta urritasuna oso gogorra pairatzen ari baitira. Kanpainaren berri emateko eta herriari elkartasun deia luzatzeko, informazio oharra jarri da herriko etxebizitzetako atari guztietan. Halaber, ekimena herriko ikastetxeen bitartez ere bideratu da, zentroek ere laguntza jaso dutelarik abenduan.

Produktuak: hegaluzea eta sardinak oliotan (latak), azukrea, dilistak, makarroi eta espagetiak, arroza eta konpresak

Horiek horrela, taldeko kide boluntarioek datorren otsailaren 4ra bitartean, hegaluzea eta sardinak oliotan (latak), azukrea, dilistak, makarroi edo espagetiak, arroza, eta konpresak edo norberaren higienerako beste produktuak jasoko dituzte, aipatutako Erdikokale lokalean. Produktuok goiz nahiz arratsaldez entregatu ahal izango dira, taldeak ezarri duen ordutegia ondokoa izanik: astelehenetik ostiralera goizez 10:30etatik 12:30etara eta arratsaldez 17:30etatik 19:30etara. Larunbatean goizen bakarrik, 10:30etatik 12:30etara bitartean. Arratsetan ez da bilketarik egiten.

Iragarki-oholari egindako loturaren bidez, etxebizitzetako atarietan jarritako informazio oharra eskaintzen dugu, horretan jarritakoa hitzez hitz irakurri nahi duenarentzat. Antolatzaileek herrian ditugun haur eta Lehen Hezkuntzako bost ikastetxeetara 1.500 eskutitz baino gehiago bidali dituzte, ikasleek hori etxera eraman eta bat egin zezaten.