Laburbira zirkuitua hilaren 16an iritsiko da Ermua Antzokira

Laburbira zirkuitu ibiltariaren hamalaugarren edizioa abian da jada. Euskarazko zortzi film laburrek osatzen dute aurtengo programazioa, eta 32 herritan izango da ikusteko aukera, tartean, Ermuan.

Ekimena Euskaltzaleen Elkarteak antolatzen du, eta Ermuko saioa Euskal Birusa elkarteak kudeatzen du. Zirkuitu ibiltari honen helburua bikoitza da: batetik, euskarazko sortzaileen kalitatezko lana ezagutaraztea, ekoizten jarraitu dezaten aukera emanez; eta bestetik, ikusleei geurean sortutako zinearen mokaduez gozaraztea.

Bira ostegunean, martxoaren 16an iritsiko da gure herrira, Azpeitiaren, Parisen, New Yorken eta Hernaniren atzetik, besteak beste. Saioa zineklubaren ordutegian egingo da, 20:30etik aurrera, eta ordu eta laurden inguruko iraupena izango du. Sormenezko ikus-entzunezkoan, fikzioak, dokumentalak eta animazioak eskainiko dira saioan, honako hauek, hain zuzen:

• Azken Saskia (Oier Fuentes)
• Beti bezperako koplak (Ageda kopla taldea)
• Ihesa (Alejandro Díaz Castaño)
• Elemakarrak (Ibon Iza)
• Jalgi (Eki Pagoaga)
• 280º (UDA Films)
• EUSPOT lehiaketako spotik onenak
• Hileta (Kepa Sojo)

Laburbira igaroko den zenbait udalerritan, zuzendari batekin solasaldia izango da. Modu horretan, sortzaileek beraien lana ikus-entzuleei zuzenean aurkezteko aukera izango dute, eta ikusleek ere zuzendariekin patxadaz hitz egin ahalko dute. Ermuan, Hileta lanaren Kepa Sojo zuzendaria izango dugu saioan. Sojo (Laudio, 1968) Euskal Herriko Unibertsitateko irakaslea da Zinemaren Historia irakasgaian, eta 2009tik Gasteizko Cortada Zinemaldiko koordinatzailea ere bada. Nazioko nahiz nazioarteko 70 sari baino gehiago eskuratu ditu bere lanei esker.