Morgan talde madrildarrak kontzertua eskainiko du ostiral honetan Ermua Antzokian

Morgan pop/soul boskote gaztea gure herrian izango dugu ostiralean, apirilaren 7an, North lehenengo diskoa aurkezteko. Carolina de Juan Nina abeslari eta pianojole madrildarra buru duen taldeak bira honetako lau kontzertu baino gehiagotan agortu ditu sarrera guztiak, eta energiaz eta emozioz beteriko zuzenekoa eskainiko du Ermuan ere.

Morgan Madrilen sortu zen 2012ko irailean, 2010etik hasita Ninak bakarka konposatu zituen abestiei instrumentuak jartzeko. Ekain Elorza bateriajole berriztarra, Paco Lopez gitarrajolea eta Alejandro Ovejero baxujolea izan ziren proiektura batu ziren lehenak, eta 2015. urtean David Schulthess teklista gehitu zitzaien North lehenengo diskoa grabatzeko. Lana 2016ko otsailean argitaratu zen, eta harrezkero, taldeak hainbat kontzertu eskaini ditu bere abestiak zuzenean aurkezteko.

Carolina de Juan abeslariak konposatzen dituen kantuek Norah Jones, Joss Stone, Florence and The Machine eta Paolo Nutini bezalako artisten eragina jasotzen dute. Morganen estiloa poparen eta ukitu amerikarra duen soularen artean dabil dantzan, Ninaren ahots goxoarekin borobilduta, eta emozioa, indarra eta energia transmititzen du eszenatoki gainean.

Morgan ostiral honetan, apirilak 7, izango dugu Ermua Antzokian, 22:15etik aurrera. Sarrerak 10 euroren truke daude salgai Lobiano Kultur Gunean, BBKren orotarako kutxazainetan, Kutxabanken webgunean eta, kontzertua hasi baino ordubete lehenagotik, Antzokiko leihatilan.

Ostiralerako girotzen joateko, Morganen abesti bat uzten dizuegu, Praying.