Herriko umeek euren egun handia ospatuko dute ostegun honetan

2017ko Santixauetako jai egitarauak martxan eta bizi-bizi jarraitzen du, eta ostegun honetan Ermuko haurren txanda izango da. Herriko txikienek goizetik gauera arte ekitaldi ezberdinez gozatzeko aukera izango dute bihar.

Jaia 10:30ean hasiko da Orbe Kardinala plazan, buruhandien irteerarekin batera, eta festak leku berean jarraituko du haurrentzako parkearekin. Bertan, puzgarriez, jokoez eta Txarangen Batzordeak antolatutako tailerrez gozatzeko aukera izango da 11:00etatik 13:00etara eta 16:00etatik 19:00etara. Euria eginez gero, ekintza guztiak Aritzmendi pilotalekuan burutuko dira.

Arratsaldean, Txarangen Batzordeak txokolate-jan handia antolatuko du neska-mutil guztientzat, indarrak hartu eta puzgarrietan jolasean eta tailerretan ikasten jarraitu ahal izateko. Gainera, 19:00etan “Kantu Kolore” haurrentzako musika ikuskizunaz gozatzeko aukera izango da Orbe Kardinala plazan.

Herriko txikienen egun handiena biribiltzeko, Orbe Kardinala plaza apar jai erraldoi bihurtuko da 20:30etik aurrera. Geroago, giro lasai eta erlaxatuagoan, Hutsa eta Doblea bikoteak pop akustikoko kontzertua eskainiko du 22:30etik aurrera Martxoak 8 plazan.

Jarraian 2016ko Umeen Eguneko irudiak uzten dizkizuegu.

• 2017ko Santixauetako programa ofiziala

Futbito txapelketak aurrera jarraitzen du

Jada aipatutako haurrentzako ekimenez gain, Skorpio Futbol Taldeak antolatzen duen futbito txapelketak ere izango du bere tartea ostegunean. 18:00etatik aurrera jokatuko dira partiduak Udal kiroldegian, eta ostiralean ere leku eta ordu berean jarraituko dute norgehiagokek. Txapelketako finalak larunbatean izango dira, egun osoan zehar, 10:00etatik aurrera.