Folkez Blai lehiaketaren XII. ediziorako prest dago Ermua

Hamabigarren urtez jarraian, Ermuko Udaleko Kultura sailak jada ezaguna den Folkez Blai musika lehiaketa antolatu du. Guztira sei folk talde lehiatuko dira Orbe Kardinala plazan irailaren 8tik 10era aurtengo edizioko txapeldunak izateko.

Folk festa irailaren 7an hasiko da, osteguna, Foulareda eta Alboka musika eskolako soinujoleek girotutako gaita poteoarekin, 19:00etatik aurrera. Hurrengo egunean, irailaren 8a, ostirala, lehiaketa ofizialari ekingo zaio Ghost number & his tipsy gypsies eta Tik Tara talde gipuzkoarren emanaldiekin. Larunbatean, hilaren 9an, Pontevedrako Obal eta Valentziako Innerlands taldeen txanda izango da, eta igandean, aldiz, Huescako Mosicaires eta A Coruñako Andrés Penabad Band taldeen emanaldiekin amaituko da lehiaketa.

Saio ofizialaz gain, asteburuan zehar lehiaketatik kanpo egongo diren talde gonbidatuen musikaz gozatzeko aukera izango dugu. Horrela, Fetén Fetén (Valladolid), Doolin (Frantzia) eta iaz garaile suertatu ziren Bruna Sonora (Madril) izango ditugu geure artean.

Lehiaketa honetan 4.500 euro banatuko dira saritan; 3.000 euro talde txapeldunarentzat, eta 1.500 euro bigarren postuan amaitzen duenarentzat. Gainera, finalera iritsi diren sei taldeek 400 euroko dieta jasoko dute Ermura etortzeko gastuak direla eta.

XII. Folkez Blai lehiaketarako aurreikusitako programa honakoa da:

• Irailaren 7a, osteguna
• 19:00: Fouraleda (Ermua) eta Alboka Musika Eskolako trikitilariak (Ermua). Gaita poteo
• Irailaren 8a, ostirala
• 18:30: Ghost number & His tipsy gypsies (Gipuzkoa)
• 19:45: Tik Tara (Gipuzkoa)
• 21:00: Fetén Fetén (Valladolid) -Talde gonbidatua-
• Irailaren 9a, larunbata
• 18:30: Obal (Pontevedra)
• 19:45: Innerlands (Valentzia)
• 23:30: Doolin (Frantzia) -Talde gonbidatua-
• Irailaren 10a, igandea
• 12:30: Bruna Sonora (Madril) -Iazko irabazlea-
• 18:30: Mosicaires (Huesca)
• 19:45: Andrés Penabad Band (A Coruña)

2017ko Folkez Blai lehiaketako kartela

Lehiaketa honek bere sorreratik bi helburu ditu: batetik, musika bere errotik bertatik sustatzea eta, bestetik, modalitate hori lantzen duten musika elkarteen erakusleihoa izatea. Hori horrela, folk taldeak bultzatzeko hasierako helburuari irailaren 8tik 10ra bitartean Ermura etorriko zaizkigun guztiei musika mota hori ezagutzeko aukera eskaintzea gehitzen zaio, guztion gustukoa izango dela espero baitugu. Lehiaketa honetan ez dute parte hartuko antolakuntzan lagunduko duten herriko taldeek, ez eta epaimahaikide izango direnek ere.

Informazio gehiagorako, kontsulta ezazu Folkez Blai lehiaketaren mikrositea.