Denboraldiko hirugarren garaipena Aitor Hernandezentzat

Aitor Hernández txirrindulari ermuarra (Specialized-Ermua Impulso) izan da Beasaingo III. Ziklokross Sari Nagusiko irabazlea. Igande eguerdian jokatu da Euskadiko agendako bigarren proba, eta zirkuitua bustita eta lokaztuta topatu dute parte-hartzaileek.

Hernandezek bakar-bakarrik gurutzatu du helmuga, eta ia minutu eta erdiko aldea atera die bigarren eta hirugarren sailkatuei, Jon Munitxari eta Xabi Muriasi, hain zuzen. 2,6 kilometro luzeko zirkuituan (870 metro asfaltoan) lehiatzen hasi orduko, bigarren itzulian eraso egin zuen ermuarrak, eta inork ezin izan zion eutsi lasterketa osoan zehar mantendu zuen erritmoari.

Podiumeko ospakizunaren ostean, Ermuko txirrindulariak bere sentsazioak partekatu ditu: “Ibilbide konplikatuko lasterketa izan da, asfaltoko aldapatxoak oso gogorrak izateaz gain, landako zatia euriagatik oso irristakor baitzegoen. Gainera, jaitsiera batean tentuz joan behar izan dut, arrazoi berberagatik oso arriskutsua zelako, baina entretenigarria izan da orokorrean. Oso ongi sentitu naiz oraingoan ere, eta bigarren itzulian jada ihes egin ahal izan dut. Orain indarrak berreskuratu eta entrenatzen jarraitu behar dut astean zehar, denboraldiko lehenengo nazioarteko proban, Laudion, maila ona emateko”.

Laudioko Nazioarteko XXX. Ziklokrossa larunbat honetan lehiatuko da, urriak 28, Ellakuriko landatan. Espainiako Kopako puntuagarria izango da.