‘Berbetan’ jardunaldiak apirilean izango ditugu bueltan Ermuan

Euskararen inguruko gogoetak burutzeko Berbetan jardunaldiek edizio berri bat izango dute datorren apirilean Ermuan. Guztira hiru hitzaldi-topaketak osatuko dute jardunaldi berrien programa, eta apirilaren 10ean, asteartea, izango da lehenengo saioa.

Berbetan jardunaldiak 1999an sortu ziren, benetako esperientzia ezberdinak eskaintzeko helburuarekin; horien bitartez, herriko euskararen erabilera eta ezagutza hobetu dezakegu. Izan ere, ekimen honekin beste herri eta entitateetan dituzten esperientzia eta iritzi ezberdinak partekatu daitezke.

Gogoeta eta iritzi trukaketarako aukera ematen duen ekimen hau; Euskal Birusa euskara elkartea, Eskolabarri ikastetxea, Ongarai eskola, Kaltxango AEK euskaltegia, Anaitasuna Ikastola eta Udal euskaltegiaren arteko elkarlanaren ondorioa da eta Ermuko Udalaren babesa du.

Aurtengo programari dagokionez, honakoak dira antolatu diren jardunaldiak:

• Apirilak 10, asteartea: Nola erabili euskara modu ez sexista batean? hitzaldia. Amelia Barquín izango da hizlaria, Filologia Hispainiarrean Doktorea eta Mondragon Unibertsitateko Hezkuntza Zientzien fakultatean Kultur arteko Hezkuntzako irakaslea. Topaketa 19:00etan hasiko da Lobiano Kulturgunean.
• Apirilak 17, asteartea: Ermuan, euskaraz bizitzeko prest? Aktibazio saioa, Kike Amonarriz euskal filologo, soziolinguista, umorista eta telebistako aurkezleak zuzenduta. 19:00etan hasiko da saioa Lobiano Kulturgunean.
• Apirilak 24, asteartea: Bideojoko saioa Game Erauntsia elkartearen eskutik, 17:15etik aurrera KZgunean. Jarduera 10 eta 14 urte arteko neska-mutilei zuzenduta dago, eta plazak mugatuak dira. Parte hartu ahal izateko, beharrezkoa izango da apirilaren 9tik 19ra bitartean izena ematea euskalbirusa@gmail.com helbidera idatzita edota 688 63 28 74 mugikor zenbakira WhatsApp mezu bat bidalita.

Berbetan programako jarduera guztiak doakoak dira. Jarraian informazio kartelak uzten dizkizuegu.