Kulturarteko Jaiak kolorez jantziko du Orbe Kardinala plaza

Ermuko XVIII. Immigrazio Jardunaldiek larunbat honetan, maiatzak 5, ospatuko dute euren egun handia, Orbe Kardinala plazan izango den Kulturarteko Jaiaren eskutik. 11:00etatik hasita, egun osoan zehar herritar guztientzat moduko ekitaldiak izango dira.

Programazioa 11:30ean hasiko da, jaiaren irekiera ofizialarekin, eta jarraian North Comando Z taldeak break dance erakustaldia eskainiko du. Eguerdian, haurrentzako jolasei ekingo zaie Antxitxiketanen eskutik, eta geroxeago, 12:15etik aurrera, Eibar Rugby Taldeak 8 eta 14 urte arteko haurrentzako jolasak antolatuko ditu kirol horretan oinarrituta.

13:15ean jarraituko du jaiak, Havana 537 talde kubatarraren kontzertuarekin, eta 14:30ean atsedenaldia egingo da, kulturarteko herri bazkarian indarrak berreskuratu ahal izateko.

Arratsaldean, 16:30ean, Mustapha Agharvanek perkusio tailerra eskainiko du, eta jarraian, 18:00etatik aurrera, Tifyur amazigh taldearen kontzertuaz gozatzeko aukera izango da. Festari amaiera emateko, Ballena Gurumbé & Malick Diaw talde afrikarraren emanaldia izango dugu 19:30ean.

Gainera, egun osoan zehar, hennazko tatuajeak eta trentza afrikarrak egiteko, izena arabiarrez idazten ikasteko eta Ermuko ikastetxeetako neska-mutilek egindako marrazkien erakusketa ikusteko aukera izango da.

Ekintza guzti horiek Ermuko Nazioarteko Lankidetza eta Elkartasun Kontseiluak antolatu ditu, eta Udalaren, herriko ikastetxeen, Antxitxiketanen, Mudo-Drogoten eta Eibarko Rugby Taldearen babesa jaso du.

Jarduerak maiatzaren 9a arte

Aniztasuna, gure herriko aberastasuna da aurtengo Jardunaldien leloa, eta ardatza beste herri batzuetatik Ermura etorri diren pertsonen seme-alabak dira. Ume horiek Bertokoak dira, hementxe jaio eta hazi baitira; gurasoak kanpotik etorritakoak diren arren, seme-alabak Ermukoak dira.

Gaia lantzen jarraitzeko, datorren asteartean, maiatzak 8, Haur eta gazte aniztasuna. Bigarren belaunaldiak direlakoak mahai-ingurua eskainiko da 19:00etatik aurrera Lobiano Kultur Gunean. Bertan izango dira, hizlari gisa, Joseba Ibarra Berritzegune Nagusiko kulturartekotasun aholkularia eta Gorka Moreno Ikuspegi-Euskal Immigrazio Behatokiko zuzendaria.

Azkenik, Jardunaldien edizio honi amaiera emateko, asteazkenean, maiatzak 9, Urko Punta elkarteak Bigarren Eskuko liburu-denda inauguratuko du Torrekua kaleko eskilaretan, Torrekua tabernaren gainean. Topaketa 19:00etan hasiko da, eta Afa El Halaoui Ahizpatasuna euskal emakume marokoarren elkarteko kidea izango da bertan. Gainera, Bassirou Faye sukaldari senegaldarrak prestatutako luncha eskainiko da.

• XVIII. Immigrazio Jardunaldietako programa osoa