Aitor Hernández garaile XCOko Euskadiko Txapelketan

Specialized-Ermua Impulso taldeko Aitor Hernández txirrindulari ermuarrak Cross Countryko (XCO) Euskadiko Txapela eskuratu du larunbat honetan, ekainak 2, Urretxun (Gipuzkoa) lehiatu den proban garaipena lortzean.

Euskadiko mountain bike Txapelketa zailtasun tekniko handiko zirkuituan lehiatu da, pilatutako lokatza kantitate handia dela eta. Hernández izan da bizkorrena 4.870 metro luzeko pistan, Javier Ruiz de Larrinagaren eta Álex Ordeñanaren aurretik.

“Euskadiko Txapelketa beti helburu nagusietako bat izaten da XCO (Cross Country) denboraldian, beraz, garaipena lortu izanaz oso gustura nago”, azaldu du Aitor Hernándezek proba amaitu ostean. “Lasterketa oso gogorra izan da, zirkuitu ikusgarri eta makala izan baita lokatzaz betea zegoelako. Baina oso polita izan da, era berean, alderdi guztietan. Igoera oso luzea eta jaitsiera oso tekniko eta irristakorra ditu pistak; zati bat oinez ere egin behar izan dugu. Beraz, guztia oso gogorra izan da”.

Ziklokross denboraldira begira, prestaketa lanen azken txanpan sartu da jada Hernández. “Orain gelditzen diren BTT lasterketetan motoreak berotzen joatea baino ez da falta ziklokrossari ekin aurretik. Denboraldia oraindik urrun dagoela dirudien arren, falta diren hilabeteak ziztu bizian pasatuko dira, eta prest egon behar dugu”, azaldu du.