Gazte Egunaren VI. edizioa, larunbat honetan Ermuan

Ermuko Gazte Asanbladak Gazte Egunaren seigarren edizioa antolatu du larunbat honetarako, uztailak 7. Egun horretarako egitarauak ekitaldi ezberdin ugari jasotzen ditu eguerditik hasi eta gauera arte.

Festa 12:00etan hasiko da Orbe Kardinala plazan, familien arteko jokoen eskutik. Jarraian, 13:00etatik aurrera, Mintzodromoak nahi duen orori euskaraz hitz egiteko eta hizkuntza praktikatzeko aukera eskainiko dio. 14:00etan argazki erraldoia egingo da, eta horren ostean, bazkari herrikoiari hasiera emango zaio.

Arratsaldean, 16:00etatik aurrera, Euskaraokearen txanda izango da; gainera, antolatzaileek sorpresa bat prestatu dutela azaldu dute, baina oraindik ez dute argitu zer izango den. Kirolzale amorratuenek 18:00etatik aurrera olinpiadetan parte hartu ahalko dute, eta 19:30etik aurrera, indarrak errekuperatzeko, poteo girotua ospatuko da.

Gauean musika izango da protagonista nagusia, Salda Badago, Tremenda Jauria eta Cooleroak taldeen kontzertuen eskutik. Emanaldiak 21:30ean hasiko dira.

Informazio gehiagorako, ikus ezazu Gazte Eguneko kartel osoa.