Aitona-amonek protagonista dira Santa Ana egunean

Herriko jaietan murgildurik gabiltzanean, gaur Santa Ana eguna ospatzen ari gara, aitona-amonen eguna. Eguerdian urteroko omenaldia eskaini zaie plazan bertan ekitaldirako bildu diren agureei. Aurten, edadetuenen bikotea Encarna Perez Garciak eta Carlos Ranz Contrerasek osatu dute, hurrenez hurren 88 eta 90 urte dituztenek. Bien lora sorta bana eta dirutxo bat jaso dute patroiaren eguna behar bezala ospatzerik izan ditzaten. Opariak Kultura, Gazteria eta Aukera Berdintasun eta Gizarte-Ongizate, Osasun, Immigrazio eta Kooperazio zinegotzi eskudunengandik, hurrenez hurren Beatrik Gamiz eta Jose Luis Araujoren eskuetatik jasoz. Nagusien Etxeko arduradunek, zentroan jokatu dituzten mahai-joko eta lehiaketetako garaileei sariak bana dizkiete.

Goiza txokolate-janaz hasi dugu, gaueko parrandan galdutako indarrak berreskuratzeko. Zazpi eta erdietan esku pilotako barrus partida baztertzaileak jokatu dira plazan. Ordu erdi beranduago bigantxak izan dira Ongarain ausarten harrokeriak astintzen. Abereak Itziarko Saka Marquesaren abeltegikoak izan dira. Etxeko txikienek haur parkea izan dute San Martinen eta arratsaldez ere izanen dute berriz. Alboka musika eskolako bandak ordu batetan kontzertua eskaini du. Aitona-amonek ordu bietan bazkari herrikoiari hasiera eman diote merkatu plazan.

Arratsaldean, afizionatuen arteko pilota partidan izango ditugu plazan, pailazoak, Irulitxa fanfarrearen kalejira, larraindantza plazan, Mulier taldearen dantza ikuskizuna eta ‘dantzaldia ‘Montecristo’ orkestrarekin. Guzti horren xehetasunak -leku eta orduak- jarduera programa ofizialean dituzue.