Arantza Morenok Peruko Joko Iberoamerikarretan parte hartuko du

Espainiako Atletismoko Selekzioak Arantza Moreno xabalina jaurtitzaile ermuarra deitu du 18. Joko Iberoamerikarretan parte hartzeko. Txapelketa horiek abuztuaren 24tik 26ra bitartean lehiatuko dira Trujillo hirian, Perun.

Moreno emaitza onen bila joango da Perura, duela gutxi Berlingo Europako Txapelketan lehiatu ostean. Bertan, hamazortzigarren postua eskuratu du xabalina jaurtiketan.

Basque Team taldeko kirolariak 59,69 metroko marka pertsonala lortu ostean eskuratu zuen Berlinera joateko txartela, eta kategoria gorenean lehiatzen den lehenengo denboraldia da. Jaurtiketa txar baten ostean, ordea, 56,33 metrotan utzi zuen xabalina Alemanian.

Orain, selekzioak deitutako beste 24 atletarekin batera joango da Moreno Trujillora, tartean, Lidia Parada xabalina jaurtitzailea.