Folkez Blai musika lehiaketak XIII edizioa aurkeztu du

Ermuko Udaleko Kultura sailak Folkez Blai lehiaketa ezagunaren edizio berri bat antolatu du, hamahirugarrena, hain zuzen. Estatuko puntu ezberdinetako sei talde arituko dira aurrez aurre lehiaketa honetan, irailaren 13tik 16ra bitartean gure herriko Orbe Kardinala plazan.

Lehiaketa honek bi helburu ditu: batetik, musika bere errotik bertatik sustatzea eta, bestetik, modalitate hori lantzen duten musika elkarteen erakusleihoa izatea. Horretaz gain, ikus-entzule guztiei musika mota hori ezagutzeko aukera eskaintzen zaie, guztion gustukoa izango dela espero baitugu.

Guztira 4.500 euro banatuko dira saritan; 3.000 euro talde txapeldunarentzat, eta 1.500 euro bigarren postuan amaitzen duenarentzat. Gainera, finalera iritsi diren sei taldeek 400 euroko dieta jasoko dute Ermura etortzeko gastuak direla eta.

Saio ofizialaz gain, asteburuan zehar lehiaketatik kanpo egongo diren talde gonbidatuen musikaz gozatzeko aukera ere izango dugu.

Hori horrela, Folkez Blai lehiaketaren XIII. ediziorako aurreikusitako programa honakoa da:

• Irailak 13, osteguna
• 19:00: Gaita poteoa Foulareda herriko taldearekin eta Alboka musika eskolako trikitilariekin
• Irailak 14, ostirala
• 18:30: Timbakada (Nafarroa)
• 19:45: Kolme Katu (Araba)
• 21:00: Ghost Number & His Tipsy Gypsies (Gipuzkoa) – talde gonbidatua, iazko edizioko irabazlea
• Irailak 15, larunbata
• 18:30: Tündra (Errioxa)
• 19:45: Samarúas (A Coruña)
• 21:00: Alos Quartet + Oreka TX + Aukeran dantza konpainia (Euskadi) – talde gonbidatua
• Irailak 16, igandea
• 13:00: Vanesa Muela (Valladolid) – artista gonbidatua
• 18:30: Besarabia (Valentzia)
• 19:45: La Kabhala Band (Toledo)

Folkez Blai 2018ko kartela

Informazio gehiagorako, kontsulta ezazu Folkez Blai lehiaketaren mikrositea.