Bertsolaririk onenak, ostiral honetan Ermua Antzokian

San Martin Azoka arrakastatsuaz gozatzeko parada izan dugu asteburu honetan gure herrian, eta festa horri lotutako kultur programazioak aurrera jarraitzen du azaro honetan zehar. Horrela, ostiral honetan, hilak 16, ohiko bertso jaialdia ikusteko eta entzuteko aukera izango dugu Ermua Antzokian.

Maialen Lujanbio, Uxue Alberdi, Andoni Egaña, Igor Elortza, Xebastian Lizaso eta Maddalen Arzallus. Hiru gizon eta hiru emakume izango ditugu eszenatoki gainean, guztiak ere goi mailako bertsolariak. Maite Berriozabal gai jartzaileak proposatutako egoeretatik abiatuta, hitz jolas biziak eta errima ederrak eskainiko dizkigute seirek.

Euskal Birusak antolatutako ikuskizuna ostiral honetan 22:15ean hasiko da Ermua Antzokian. Sarrerak salgai daude 10 euroren truke Lobiano Kultur Gunean, Kutxabanken webgunean eta, jaialdia hasi baino ordubete lehenagotik, Antzokiko leihatilan.