15 pertsonak osatzen dute Udalaren eta Lanbideren Enplegu Plana

Ermuko Udalak 2018ko bigarren Enplegu Plana jarri du martxan, oraingoan Lanbiderekin lankidetzan. 15 pertsona jardunaldi osorako kontratatu ditu instituzioak, interes sozialaren eta erabilgarritasun publikoaren alorrean lan puntualak eta ezohikoak burutu ahal izateko. Sei hilabeteko kontratua izango dute guztiek, hil honetan bertan hasi eta 2019ko apirilera bitartean.

Lan eskaintzak Lanbide Euskal Enplegu Zerbitzuak kudeatu ditu, eta honako profilak betetzeko 15 pertsona hautatu ditu:

• Lau igeltsero
• Bi ofizial
• Bi peoi
• Lau pintore
• Bi ofizial
• Bat graffitietarako
• Peoi bat
• Elektrizitateko ofizial bat
• Soldaketako ofizial bat
• Lorategietarako hiru peoi
• Garbiketarako bi peoi

Enplegu Plan honen helburua Lanbiden izena emanda dauden pertsona langabetuen enplegagarritasuna hobetzea da. Era berean, lan munduan sartzeko zailtasun bereziak dituzten pertsonek euren kualifikazioa eta gaitasun pertsonalak hobetzeko eta indartzeko aukera dute aldi baterako lan esperientziari esker.

Bestalde, ekintza hauen bitartez, lanpostuak sortzen dira eta horiek herriaren garapen ekonomikoa eta modernizazioa bultzatzen dute. Izan ere, kontratatuen lanak balore gehitua eskaintzen dio herriari, hori mantentzeko ekintzak egingo baitituzte.

184.306,48 euroko aurrekontua prestatu da 15 pertsona horien soldatak ordaintzeko. Gainera, beste 4.000 euro lan arriskuen prebentziorako formaziora bideratuko dira, eta 23.600 euro gehiago ekipamenduetarako. Guztira 211.906,48 euroko kostua izango du Enplegu Plan honek; horietatik 86.140 euro Lanbidek jarriko ditu, eta 125.766,48 euro, aldiz, Udalak.