Korrika XXI. edizioa herritarroi aurkeztuko zaigu

Gure herrian XXI. Korrikaren jarduerak antolatzen dituzten taldeek –Kaltxango AEK, Berbalagun eta Alboka Musika Eskola- aste honetan ekimena herriari aurkeztuko dizkigute. Ostegun arratsaldean izango da, martxoaren 28an, herriko Orbe Kardinalaren plazan sei eta erdietatik aurrera. Edizioaren xehetasunak aurkeztuko, laguntzaile eta kilometro erosle diren erakundeetako ordezkariek argazkiak atera ahal izango dituzte photocall egongo baita, folk musikaren fusio erakutsiko digun ikuskizuna, material salmenta –petoak, arropak, laguntzaile kartelak, eta abar…). Arratsaldeari amaiera emango zaio kalejiraz eta pintxo-poteoaz.

Hilabete baino gutxiago geratzen zaigu Korrikaren XXI. edizioari hasiera emateko. Aurtengoaren goiburua ‘Klika’ izango da eta apirilaren 4an abiatuko da Gares (NA) herritik. Hamar egun beranduago -14an- Gasteiz hiriburura iritsiko, ibilbideari amaiera emanez Arabako hiriburuan. Ermutik bezperan pasako da, apirilaren 13an, eguneko 15:21ean –gutxi gorabehera-. Oso egun eta ordutegi paregabean, larunbata, egun argia eta ordu ezin hobeak baitira. Baina euskararen aldeko martxa ez da egun bakarrera mugatuko. jadanik eta egun handi horretara bitartean Korrika Kulturala izenaz ezagutzen dugun jarduera ugari izango baititugu, girotzen joateko eta euskaraz gozatzeko.