Mirene Moreno Bera Bera eskubaloi taldera doa

Ermuarrak Emakumeen Ohorezko mailan jokatuko du 2019-2020ko denboraldian

Mirene Moreno Fernandez jokalariak Donostiako Super Amara Bera Bera taldearekin konprometitu da datozen bi denboraldietarako. Hegalean jokatzen duen jokalaria astelehenean aurkeztu zuten Donostian Tati Garmendia arduradunak eta Imanol Alvarez entrenatzaileak. Mirenek ezkerreko hegalean jokatuko du, postua Sara Gilekin batera konpartituz. Gazte ermuarra eskubaloiaren goreneko mailara iritsiko da, azken bost urteak Ohorezko Zilarrezkoan jokatu eta gero, Errotabarri E.K.E.ren elastikoarekin.

Mirene Moreno fisikoki txikitxoa izan arren, ustezko ahulezi itxura horrek pistan duen jenio eta adorea ezkutatzen du; lehiatzeko sen nabaria, koordinazio ona eta abiadura ditu eta abila da baloia eskuetan duenean, jasotzen dituenetatik gehienak sarean sartzen dituelarik, bereziki kontraerasoko jokaldietan, horiek baititu gustuko eta ezaugarri nagusi. Aurtengo udan –uztailean- 21 urte beteko ditu, Gizarteratze laneko ikasketak egin ditut eta beti herriko taldean jokatu izan du. Gaztetatik duen joko biziagatik nabarmendu izan da; Bizkaia nahiz Euskadiko selekzioan jokatu izan du. Baita Espainiakoarekin, izan ere, iaz juniorrekin mundiala jokatu izan zuen Hungarian. Kirola ezaugarri duen familiako kide da hiru ahizpek eskubaloian jokatutakoak baitira, atletismoa egin izan dute eta bere aurrekoa –Arantza- Espainiako txapeldun da xabalina jaurtitzen.

Mirene Morenok adierazi duenez fitxaketa “ezustean iritsi” da eta horregatik “pozez zoratzen” dago. Ermuarra Donostiara joateko prozesua azkarra izan da talde bien artean elkar ulertze eta harreman ona dutelako. Jatorrizkoak ez du eragozpenik jarri eta hartzailea heziketa eskubideei aurre egiteko ados egon delako.