Aimar Galdos, Espainiako Txapeldun Taldeko Erlojupekoan

Aimar Galdos ermuar txirrindulari gaztea Taldekako Erlojupekoan Espainiako Txapeldun izan da Euskadiko kadeteen selekzioarekin. Chesteko -Valentzia- Ricardo Tormo zirkuituan lehiatu da txapelketa pasatu den asteburuan.

Euskadiko kadeteen selekzioko lau txirrindulariek 10 minutu eta 17 segundotan osatu zuten 8 kilometroko ibilbidea. Hiru segundo gehiago behar izan zituen Kataluniako selekzioak, eta lau gehiago Gaztela Leongoak.

Emaitza horri esker, Euskal selekzioa igo da podiumeko lehenengo mailara.

Bestalde, Izaro Oliveira infantil mailako txirrindulari ermuarra hamazazpigarren postuan sailkatu da lineako lasterketan, eta 19 minutu eta 32 segundo behar izan ditu 12 kilometroko ibilbidea egiteko. Gymkana proban, aldiz, hogeita hirugarren postua lortu du. Parte hartu duen bi probetan, Euskadiko selekzioko onena izan da Oliveira.

Lerro hauen ostean Aimar Galdosek Espainiako Eskolako Txirrindularitza Txapelketan izandako partaidetza ikusi daiteke.