'Si haces que me sienta menos' liburuaren aurkezpena Emakumeen Topalekuan

Maria Alvaro Caballero idazleak Si haces que me sienta menos liburua aurkeztuko du ostegun honetan, azaroak 7, 18:00etatik aurrera Ermuko Emakumeen Topalekuan.

Maria Alvaro aktibista eta ADICAE elkarteko idazkaria da, eta bere lana benetako genero indarkeria kasuetan oinarritzen da. Indarkeria matxistaren biktima izan diren adin eta klase sozial ezberdinetako emakumeen testigantzak jasotzen ditu, eta sentimenduak eta gogoetak ere biltzen dira bertan.

Aurkezpenean, idazleak liburua osatzeko egindako ibilbidea azalduko du, baita jaso dituen edukiak eta horren atzean dauden arrazoiak ere. Horrela, bertaratzen diren pertsonekin batera eztabaida eratuko da, galdera-erantzunen bitartez.

Emakumeak ahalduntzea eta elkarri babesa emateko laguntza-sarea sortzeko giro aproposa sortzea da topaketaren helburua, bereziki, autoestimua areagotzeko behar gehiena dutenen artean.

Bertaratzea librea eta doakoa da.