Aitor Hernandezek emaitza desberdinak lortu ditu asteburu luzean

Aitor Hernández (Specialized-Ermua Innpulso etxeek babesturiko) txirrindulariak ez du amestutako ez espero zituen emaitzarik izan azken asteburuan, C2 UCI mailako lasterketa bi jokatu baititu, biak Euskadin, helmuga zeharkatzen zortzigarren eta bosgarren postuan amaitu dituelarik probak, hurrenez hurren. Lehenengoa Zuiako Ametzagan (Araba) larunbatean, eta bigarrena Igorren (Bizkaia) atzoko igandean.

Ermuarrak bere emaitza hobetu zuen atzo euskal ziklo-krosaren ''katedralean'' (Igorren) egindako lasterketan, Felipe Ortsek irabazi zuelarik zirkuitu gogor, busti eta lokaztuaren gainean. Sailkapen nagusiak Aitorrek lortutako bosgarren postua jasotzen du. Larunbatean Zuian zirkuitua erabat lehor eta azkar zegoen, baina ermuarrak ez zuen proban bere pedal kolperik onena aurkitu, ezta gustura sentitu ere.

Atzoko proba amaituta Aitor Hernandezek honako adierazpenak egin zituen: "Atzo Ametzagan ez nuen nire egunik onena izan, baina gaur asteburuari buelta ematea lortu dut lasterketa hobe eta positiboago batekin, Igorre bezalako agertoki ezin hobean. Katedralak ez du inoiz hutsik egiten eta gaur jende asko izan dugu animatzen, giro bikainean. Indartsu atera naiz, gero erritmoa doitu egin dut, bukaeran estutu ahal izateko. Horrelako lasterketa batean lehenengo boskotean amaitzea pozgarria da, eta pozik nago, hurrengo asteetarako motibazioa emango didala uste baitut".