Valdespinako markesaren eta parrokoaren arteko gutun-harremanak

Tokiko historiaren ezagutzan sakontzeko asmoz, gure udal liburutegiak Ermuko XIX. mendearen amaierako eta XX. mendearen hasierako datuak, dokumentuak eta berriak bilatu eta biltzen jarraitzen du, hemeroteka zein artxibo historikoetan.

Lan horren barruan, noizbehinka gai bitxi edo azpimarragarriak aurkitzen ditugu, hala nola, gaur dakarguna; herriko parroko edo eliza erretore zen On Teodoro Zuazuak eta Baldespinako Markesak (On Ignacio de Orbe y Vives Cañamás zenak) 1950. urtean elkarri idatzitako eskutitzak, elizan egindako eta oraindik egin beharreko obra batzuen harira.

"Gutun hauen bidez, Markesaren eta elizaren arteko hierarkia-harremana zein zen antzeman dezakegu, bai eta elizan egindako obra edo aldaketei buruz hitz egiterakoan parrokoak Markesari pleitesiaz idazten dioela ere" laburbiltzen du Marifran Iparragirrek, bilketa lanaren arduradunak, zeina 2019ko Enplegu Planaren bidez kontratatua izan zen.

Gutun horiek oso-osorik irakur daitezke, Tokiko Bildumaren barne, Orbe familia eta Santiago Apostoluaren Eliza izeneko atalean.