Haurren elikadurari buruzko hitzaldia Lobianon

Ermuko Udaleko Esku-hartze Sozioedukatibo eta Psikosozialeko Zerbitzuak (SISP) haurren elikadurari buruzko hitzaldia antolatu du. Saioa 0 eta 2 urte bitarteko seme-alabak dituzten familiei zuzenduta dago, eta otsailaren 12an izango da, asteazkena, arratsaldeko 17:30ean Lobiano Kultur Gunean.

Urtero gurasoentzat antolatzen diren Competencias Parentales izeneko hitzaldi sortaren baitan antolatutako ekimena da. Horren helburua 0 eta 18 urte arteko haurrak dituzten gurasoei gai ezberdinen inguruko informazioa eskaintzea da. Topaketak adin tarteka antolatzen dira; oraingoan, 0 eta 2 urte arteko haurren gurasoei edota horiekin lan egiten duten profesionalei zuzentzen zaie deialdia.

Lehenengo topaketa honetan, etxeko txikien elikadura ohiturei, elikagaiei, elikadura eta jatordu ohitura egokiei buruz hitz egingo da, eta arlo horretan zailtasunak dituzten familiei gomendioak eskainiko zaizkie.

Saioa ordu eta erdikoa izango da, eta irauten duen bitartean, Antxitxiketan Aisialdi Taldeak haurrentzako doako zaintza zerbitzua eskainiko du.

Hitzaldian parte hartu ahal izateko, izena eman beharko da hezkuntza zentroetan (izen-emate orriak banatu dira San Lorenzo, San Pelayo, Eskolabarri, Anaitasuna eta Ongarai eskoletako 2 urteko geletan), Haurreskolan edo Colourful haurtzaindegian. Gainera, informazio eta izen-emate txokoa prestatu da anbulatorioan, pediatria zerbitzuan. Azkenik, WhatsApp bidez ere apuntatu daiteke, 688 854 510 telefono zenbakira idatzita.