Gazteen irakurketa taldeek amaiera eman diote denboraldiari

Gazteen irakurketa talde biek, paperezkoan zein euskarri digitalean jarduten dutenak, denboraldiari amaiera eman diote maiatza honetan, jardueraren antolatzaile den udal liburutegiak ezagutzera eman duenez. Talde horiek 9 eta 11 urte bitarteko neska-mutilek osatzen dituzte, partaideek euskaraz nahiz gaztelaniaz irakurtzen dute euskarri bietan. Ipuinak, komikiak, olerkiak edo istorioak irakurtzen dituzte, eta gero denen artean komentatzen dituzte. Gainera, sormenarekin eta literaturarekin lotutako beste jarduera batzuk egiten dira. Guztira zortzi izan dira talde bakoitzaren saioak. Aurrez aurreko jarduerak badira ere, alarma-egoeratik aurrera bideokonferentziaren bidez garatu dira.

Paperean irakurtzen duten irakurketa taldeko partaideak hileko asteazken batean batu dira. Saioak Onintze Goitiz idazleak dinamizatu ditu. Komiki, ipuin bilduma, eleberri, asmakizun liburu... denetarik irakurri dute partaideek. Azpimarragarriena, liburuek daukaten dimentsio soziala aipatzea: lagunartean (irakurketa taldeko kideak) eta etxekoen bizipena, hauen inplikazioa, sukaldeko errezetak egiterakoan, irakurgaia konpartitzerakoan... Irakurketa kluba lagunarte atsegina izan da, bakoitzak dituen ezaugarri ezberdinek elkar aberasten gaituztela ikusi dute partaideek, bakoitzaren ezberdintasunetatik elkarrekin bizipenak izateko aukera izan da. Irakurleen hitzetan azken saioak bideokonferentziaz egin izanagatik aurtengo jarduera "futurista" bukatu duten arren, oso balorazio ona egin dute.

Denboraldi honetan irakurri eta komentatu dituzten liburuak ondorengo hauek izan dira:

• Urriaren 16an - Txinara bidaia/BeKa
• Azaroaren 13an- Melodía en la ciudad/Benjamin Lacombe
• Abenduaren 11n- Gregorio katarrino/Juan Kruz Igerabide
• Urtarrilren 15ean - Enigmak: jo erronka zeure buruari misteriozko 25 istorioren bidez/Victor Escandell
• Otsailaren 12an- 28 ipuin parre egiteko/Ursula Wölfel
• Apirilaren 8an- Escarlatina: la cocinera cadáver/Ledicia Costas
• Apirilaren 22an-Tristeak kontsolatzeko makina/Anjel Lertxundi
• Maiatzaren 13an-Sugeak txoriari begiratzen dionean/Bernardo Atxaga

Fernando Morillo idazleak dinamizatutako   euskarri  digitaleko taldearen partaideek Liburutegiak mailegatzen dizkien tabletak erabiltzen dituzte. Hileko larunbat batean batzen dira eta irakurketak saioan bertan egiten dituzten irakurketarako erabiltzen den euskarri teknologikoaz eta ikus-entzunezko esperientziaz gozatuz. Gainera motibazioa, emozioak eta auto-estimua lantzeko joko eta ariketak lantzen dira.

Egindako saioetan zehar, liburuen garrantzia barnetik landu ahal izan dute partaideek, gailu eta aplikazio elektronikoez lagundurik, eta baita askotariko arteek eskainitako bestelako modu tradizionalekin ere (idazketa, antzezpena, jolasa, meditazioa…). Dena izan da barne-garapenaren indargarri. Liburuetako istorioen eta pertsonaien bitartez, eta jolas literarioen eta sormen sustatzaileen bidez, hezkuntza, sormena, baloreak, kooperazioa eta emozioak landu ahal izan dituzte, ondo pasatzen zuten bitartean.

Irailean denboraldi berriari hasiera ematea aurreikusita dago

Irailean irakurketa taldeen denboraldi berria hasiko da. Interesatzekotan Liburutegitik pasa zaitezke, 943179212 telefonora deitu edo zure datuekin mezua bidali biblioteca@udalermua.net helbidera. Ekintza hauek doakoak dira eta plaza mugatuak dituzte, ondorioz, parte hartu ahal izateko aldez aurretik izena eman behar da.