Liburu digitalen deskargen hazkunde nabarmena eLiburutegian

Covid-19aren pandemiak sortutako ezohiko egoerak bultzada handia eman dio eLiburutegia zerbitzuaren erabilerari, liburutegien testuinguruan. Eusko Jaurlaritzako Kultura eta Hizkuntza Politika Sailak sortutako plataforma Euskadiko Irakurketa Publikoko Sarearen bidez eskaintzen da, eta maileguan dauden liburu digitalak deskargatzeko eta filmak, telesailak, kontzertuak eta dokumentalak ikusteko aukera ematen du.

Estatistiken arabera, martxoan, apirilean eta maiatzean Ermuko udal liburutegiko bazkideek 768 liburu digital deskargatu dituzte: 179 martxoan, 352 apirilean eta 237 maiatzean.

Epe horretan, 168 pertsonak eman zuten alta plataforman: 89 lagunek martxoan, 61ek apirilean eta 18k maiatzean.

eLiburutegian gehien deskargatu diren liburuei dagokienez, hiruhileko berezi honetan Ermuko liburutegiko bazkideek Dolores Redondoren La cara norte del corazón eta Juan Gomez-Juradoren Loba negra eta Reina roja aukeratu dituzte gaztelaniaz. Euskarazko lanei dagokienez, Karmele Jaioren Aitaren etxea, Geronimo Stiltonen Bidaia zoroa Sagutxistanera eta Jon Arretxeren Beti Iparralderantz izan dira irakurrienak.

Nola erabili eLiburutegia

eLiburutegia plataforman sartzeko, nahikoa da Euskadiko Irakurketa Publikoko Sareko bazkide izatea eta liburutegiko gainerako zerbitzuetara sartzeko erabiltzen diren datu berak sartzea (bazkide-zenbakia eta pasahitza; bazkide egitean jasotzen diren datuak).

Erabiltzaile bakoitzak hilean lau liburu irakurtzeko eta astero bi film ikusteko aukera du eLiburutegiaren bidez. Helbide honetan, eduki digitalak gailu elektronikoetan nola deskargatu azaltzen da.

Bazkide zenbakia eta pasahitza gogoratzen ez dutenek Udal liburutegira dei dezakete, 943 17 92 12 zenbakira, 08:30etik 14:30era, WhatsApp bidez mezua bidali 943 17 92 12 zenbakira edo e-mail bat idatzi biblioteca@udalermua.net helbidera.

Bestalde, Euskadiko Irakurketa Publikoko Sareko liburutegi bateko bazkide ez direnek erabiltzaile-txartela eta eLiburutegian sartzeko pasahitza eskura ditzakete Udal liburutegira deituz edo e-postara idatziz.