Enplegu Zentroa Konbentukoa kalean kokatuko da

Udaleko Enplegu Zerbitzuek aurrez aurreko arretari ekingo diote, aldez aurretik hitzordua eskatuta

Ermuko Udaleko Lan Orientazioko Zerbitzuak eta Enplegu Zentroak kokaleku berria estreinatu du normaltasun partzialeko aro berri honetan. Udal sail hau Konbentukoa kaleko 5. zenbakira lekualdatuko da gaurtik aurrera, udaletxearen eranskinean, Abiapuntu bulegoaren alboan, duela gutxira arte Euskara Zerbitzua kokatzen zen eraikin berean.

Izarra Txikitik udalerriko erdigunerako lekualdaketa horrek herritarrei asko erraztuko die zerbitzu horretara joateko aukera; izan ere, horrela, gizarte-politiketako gainerako zerbitzuetatik eta Abiapuntu erregistro eta informazio orokorreko bulegotik oso hurbil geratuko da.

Bestalde, Lan Orientazioko Zerbitzuak eta Enplegu Zentroak aurrez aurreko arretari ekingo dio aste honetatik aurrera, hitzordua eskatuta. Bertara joan ahal izateko, aldez aurretik deitu 943 17 90 18 telefonora hitzordua hartzeko.