Abisua biharko: alerta laranja muturreko tenperatura altuengatik

Segurtasun Sailaren barne dagoen Larrialdiei Aurre Egiteko eta Meteorologiako Zuzendaritzak alerta eman du tenperatura altu iraunkorren eta muturreko maximoen pronostiko bereziagatik. Bereziki biharko -uztailaren 30eko- ostegunerako.

Euskalmetek, Euskal Meteorologi Agentziak honako pronostikoa iragarri du: “Bihar beroa albiste izango da. Hego-ekialdeko haizea ibiliko da eta termometroa 35-40 ºC artean ibiliko da hainbat bazterretan. Kantauri isurialdeko hainbat puntutan 40 ºC-tik gora ere igo daiteke termometroa. Eguzkia bistan izango da eta arratsaldean bero-hodeiak garatuko dira, ez da baztertzen han-hemenka zaparrada edo trumoi-ekaitzen bat botatzea. Egunaren amaieran baliteke kostaldean haizea ipar-mendebaldera aldatzea, bolada gogorrekin, mendebaldean bereziki”.

Hori dela eta, bero-bolada horren aurrean kontu handiz ibiltzeko eskatu dute. Eta mesedegarri diren jarraibide eta gomendio batzuk ematen dituzte, batez ere arrisku-taldeetan sartzen diren pertsonentzat: haurrak eta adinez oso nagusiak direnak.

Abisuak honako hitzak erabiltzen ditu:

Osteguna, 2020/07/30:

- Alerta laranja, tenperatura altuengatik, 12: 00etatik 21: 00etara. Tenperatura maximoak 37 ºC-ra irits daitezke kostaldean, 39 ºC-ra Kantauri isurialdean, 37 ºC-ra trantsizio eremuan eta 38 ºC-ra Ebro ibaiaren ardatzean. Arratsalde-gauean kostaldean haizea mendebaldetik ipar-mendebaldera aldatuko da.

- Alerta laranja, baso-suteak izateko arriskuagatik, 12: 00etatik 24: 00etara. Baso-suteen arriskua oso handia da EAEn, tenperatura altuak, hegoaldeko haizea eta hezetasun erlatibo txikia direla eta.