‘Hiri Inklusiboa, Hiri Hezitzailea’ sare tematikoko partaide da Ermua

Ermuko Udalak Hiri Inklusiboa, Hiri Hezitzailea gaikako sarearen lehen saioan parte hartu du, Hiri Hezitzaileen Nazioarteko Elkartearen barne. Guztira 34 udalerrik parte hartzen dute Gasteizko Udalak koordinatzen duen sare horretan, eta Ermua da bertako kide diren lau euskal udaletako bat, Barakaldo, Bilbo eta Arabako hiriburuarekin batera.

Lehenengo lanaldian bi saio egin dira. Alde batetik, Hiri hezitzailea: Udalak eta eskola inklusiboa ikastaroa eskaini da, EHUk sustatuta. Bertan, hainbat udaletako, hezkuntza-arloko eta arlo horretako adituak diren 100 pertsona inguru bildu dira. Bestalde, Gasteizko Udalak, sarearen koordinatzaileak, 84 parte-hartzaile bildu ditu linean topaketa berezi bat burutzeko. Bi saioetan inklusioari, gizarte-politikei eta inklusio-politiketan lan egiteko beharrezkoak diren lau "C"ei (gazteleraz) buruz hitz egin da: kultura, gaitasunak, baldintzak eta konpromisoa (Cultura, Competencias, Condiciones eta Compromiso).

Jardunaldiari amaiera emateko, hausnarketa gisa gizarte-jarrerek hezkuntza-aldaketan laguntzen dutela azpimarratu da, eta inklusioa, berez, aurrerapenak eta atzerapenak dituen prozesua dela.

Ermua Hiri Hezitzailea proiektuak beste udalerri batzuekin lankidetzan dihardu Hiri Hezitzaileen Nazioarteko Sarearen barruan, eta, bereziki, Gasteizek koordinatzen duen Hiri Inklusiboa, Hiri Hezitzailea izeneko gaikako adarrean. Proiektu honen helburua gizarte eta hezkuntza beharrei erantzutea eta Ermua gero eta inklusiboagoa bihurtzea da. Ildo horretan, sareko kide izateak erakundeen babes handiagoa izatea, beste udalerri batzuekin esperientziak eta ekimenak partekatzea eta gizarteratzearen ikuspegi bera partekatzea eskatzen du. Horri esker, gizarte-politikak lerrokatu daitezke, herritarrei egunerokotasunean laguntzen dieten ekimenen inguruan ikasi, horiek landu eta aktibatzeko, eta gizarte-arazo komunei erantzun partekatuak emateko.