Ertzaintzaren irizpideak Alarma-Estatuaren neurri berrien aurrean

Herritarrek Eusko Jaurlaritzaren urriaren 26ko 36/2020 Dekretuaren inguruan dituzten zalantzak argitzeko dokumentua prestatu du Ertzaintzaren buruzagitzak. Dekretu horren bidez, Alarmaren Estatuaren esparruan, Covid-19aren pandemiaren aurrean hartu beharreko prebentzio-neurri espezifikoak zehazten dira. Dekretuak ezarritako neurriei dagokienez ertzainek eta udaltzaingoek jarraituko dituzten aplikazio-irizpideak jasotzen ditu testuak. Horrela, galdera-erantzun formatuan, herritarren artean zalantza gehien sor ditzaketen gaiak argitzen saiatzen da.

Bizi den udalerritik kanpoko joan-etorriak

• Mugikortasunari dagokionez, zer da udalerri mugakidea? Bizileku-udalerriaren ondoko udalerria, bertara zuzenean sartzen dena, mugakideak ez diren beste udalerri batzuetatik igaro gabe.
• Baimenduta al dago erosketak egiteko azalera handi edo antzeko batera joatea? Elikagaiak edo baimendutako beste produktu batzuk erosteko joan-etorriak bizi diren udalerriko merkataritza-establezimenduetara edo mugakideetara egin behar dira. Bizileku edo mugakide den herrian ematen ez diren zerbitzu eta horniduretarako, salbuespen gisa, hurbilen dagoen azalera handira lekualdatu ahal izango da.
• Onartzen al da adinekoen egoitzetara joatea? Bai, Euskal Autonomia Erkidegoaren barruan, betiere zentroak berak baimendutako bisitak badira.
• Onartzen al da espetxeetara bidaiatzea? Bai, baldin eta Espetxe Agintaritzak emandako baimena badu. Euskal Autonomia Erkidegotik irten ahal izango da helmugako erkidegoak horretarako aukera ematen duenean.
• Ibilgailuen tailerretara eta kontzesionarioetara joateko aukera dago? Bai, atzeraezinak eta nahitaezkoak diren eta aurrez aurre egin behar diren kudeaketak egiteko.
• Baimenduta al dago erlijio- edo kultu-zerbitzuetara joatea? Bai, salbuespen gisa, bizi den udalerrian halakorik ez dagoenean eta beti gertuen dagoen lekura.
• Joan al daiteke aireportura, geltokietara, etab. pertsona bat jasotzera? Bai, edozein senide, bere bizilekura itzultzeko bakarrik.
• Bisita al daitezke mendekotasuna duten senideak, desgaitasuna duten pertsonak edo bereziki ahulak diren pertsonak? Ez, laguntza- eta zaintza-lanak egitera bakarrik joan ahal izango da etxera.
• Baratzeetan lan egiteko lekualdatu al daiteke? Bai, bizi diren udalerriko eta udalerri mugakideetako baratzeetan.
• Bidaiatu al daiteke bigarren egoitzetara? Ez, salbu eta udalerri mugakideetan badaude.
• Onartzen al da arrazoi sindikalengatik, alderdi politikoen, enpresa-elkarteen eta antzekoen jarduerengatik lekualdatzea? Bai, jarduera instituzionaltzat hartzen baitira.

Kultura- eta kirol-jarduerak

• Bisita daitezke hilerriak? Bai, baina bizi den udalerrian edo mugakideetan bakarrik.
• Egin al daitezke kultura-etxeetan, kirol-eskoletan eta abarretan egiten diren jarduerak? Bai, bizi den udalerrian edo mugakideetan.
• Ostalaritzako eta jatetxeetako lokalen barruan jarduerarik egon al daiteke ezarritako orduetatik kanpo? Bai, ostalariek establezimenduaren barruan lan egin ahal izango dute lokala prestatzeko, bai 23:00etatik aurrera, bai 06:00ak baino lehen. Ezin da etxez etxeko banaketa-zerbitzurik eman, ezta 23:00etatik aurrera jaso ere.
• Joan al naiteke entrenatzera bizi naizen udalerritik edo udalerri mugakidetik kanpo? Ez, salbu eta kirolari profesional, erdi-profesional, Basque Team edo Goi-mailako kirolariaren egiaztagiria badu.
• Beste herri bateko kiroldegira joan naiteke kirol-jarduera bat egitera? Bai, herri mugakidea bada.

Kontsulta itzazu, halaber, Eusko Jaurlaritzak jarduera fisikorako eta kirolerako argitaratu dituen jarraibideak esteka honetan.