Bizkaiko errepideen beharrak eta erronkak identifikatzeko parte-hartze prozesua

Bizkaiko Foru Aldundia Bizkaiko Errepideen II. Lurralde Plan Sektoriala egiten hasi da. Dokumentu hori plangintza sektorialerako tresna izango da, eta lurralde historikoko errepide-sare osoan sartu beharreko irizpideak, helburuak, lehentasunak eta hobekuntzak ezarriko ditu.

Plana 2023tik 2035era egongo da indarrean, eta etorkizunean garatu beharreko ekintzak zehazteko esparru gisa balioko du. Egun, dokumentua diagnostiko-fasean dago, eta Bizkaiko Foru Aldundiak partaidetza-prozesua ireki du, herritarrek etorkizuneko erronkak, joerak eta beharrak identifikatzen lagundu dezaten, Bizkaiko errepideen erabiltzaile gisa duten esperientzian eta ezagutzan oinarrituta.

Planari eta prozesu honetan parte hartzeko moduari buruzko informazio guztia ekimenaren webgunean aurki dezakezue.

Etorkizuneko erronkak

Mugikortasunak gaur egun sortzen dituen erronkek eta etorkizunean ekarriko dituenek gainditu egiten du barne-errekuntzako eta erabilera pribatuko autoan oinarritutako mugikortasun tradizionalaren eredua. Gero eta beharrezkoagoa da mugikortasun-eredu disruptibo berriak sortzea, konponbidean hainbat erronka txertatuko dituztenak; besteak beste, klima-aldaketa, biztanleriaren adina edo digitalizazioa.

Bizkaian mugikortasunak datozen urteetan izango dituen erronkei erantzuteko, benetan zer den beharrezkoa aztertzeko eta hausnartzeko espazioa eskaintzen du prestatzen ari den Errepideen Plan berriak. Mugikortasun eredu berriek garraio iraunkorrago baten aldeko apustua egiten dute, azpiegitura berriak sortzera bideratutako eskaria aztertzeko joera zaharra hautsiz. Eredu disruptibo berri horiek beste aldagai batzuk sartzen dituzte azterlanean, herritarren beharrei erantzun egokiena emateko. Plana egiteko, etorkizuneko erronka hauek hartu dira kontuan:

• Klima-aldaketa
• Jasangarritasuna
• Erronka teknologikoa
• Erronka demografikoa

Bestalde, irizpide eta helburu hauek hartu dira kontuan:

• Jasangarritasuna
• Eraginkortasuna
• Kalitatea
• Segurtasuna
• Lehiakortasuna
• Ekitatea
• Berrikuntza
• Koordinazioa
• Erresilientzia
• Eskalagarritasuna